মৃত্যু অৱশ্যম্ভাৱী। জন্মিলে এদিন মৰিবই লাগিব। ই চিৰসত্য। সেই চিৰসত্যৰেই সত্যতা পুনৰ প্রতীয়মান কৰি ২০২৪চনৰ আজিৰ দিনটোতে পৰলোক গমন কৰিছিল বীৰাংগনা বিৰুবালা ৰাভাই। আজি এইগৰাকী সাহসী নাৰীৰ প্ৰথম মৃত্যু বাৰ্ষিকী।
জন্মৰ পৰা মৃত্যুলৈকে এই সময়ছোৱা খুব কমসংখ্যক লোকেহে একক আৰু অনন্যভাৱে কটাবলৈ সক্ষম হয়। নিজৰ লগতে দহৰ বাবে স্বেচ্ছাই আৰু নিঃস্বার্থভাৱে দেহে-কেহে নিজকে নিয়োজিত কৰা লোকৰ সংখ্যা খুব কম। আঙুলিৰ মূৰত গণিব পৰা। তেনে লোকে মৃত্যুকো জয় কৰিবলৈ সক্ষম হয়। কায়িকভাৱে তেওঁলোক অতীত হয়; কিন্তু কৰ্মৰ জৰিয়তে তেনে লোক চিৰকাল অমৰ হৈ থাকে। কৰ্মৰে তেওঁলোক চিৰজ্যোতিষ্মান। ১৩ মে’ত কায়িকভাৱে আমাৰ মাজৰ পৰা বিদায় লোৱা তেনে এক চিৰজ্যোতিষ্মান-অমৰ সূৰ্যৰেই পোছাকী নাম- বিৰুবালা ৰাভা। বিজ্ঞানৰ চৰম অভ্যুত্থানৰ সময়তো প্রত্যন্ত অনেক অঞ্চলত চলি থকা ভয়ংকৰ অন্ধবিশ্বাস- ডাইনী হত্যা।
অন্ধবিশ্বাস, ডাইনী হত্যাৰ বিৰুদ্ধে জনসাধাৰণৰ মাজত সচেতনতা আনিবলৈ আপ্ৰাণ চেষ্টা কৰা সাহসী যুদ্ধা গৰাকীয়েই হৈছে বিৰুবালা ৰাভা। গোৱালপাৰা জিলাৰ এক পিছপৰা অঞ্চল ঠাকুৰভিলা গাঁৱৰ পৰা অন্ধবিশ্বাসৰ বিৰুদ্ধে কৰা একক আৰু নীৰৱ আন্দোলনৰ বাবে বিৰুবালা ৰাভা সমাজ জীৱনৰ এক যুগান্তকাৰী আদৰ্শ। য’তেই অন্ধবিশ্বাস, ডাইনী সমস্যাই গা কৰি উঠিছিল, তাতেই বিৰুবালা ৰাভা উপস্থিত হৈ জনসধাৰাণক পৰিত্ৰাণৰ পথ দেখুৱাব সক্ষম হৈছিল।
২০০০ চনৰ পৰাই ধাৰাবাহিকভাৱে তেওঁ সমাজত প্ৰচলিত ডাইনী প্ৰথাৰ বিৰুদ্ধে জনজাগৰণৰ সৃষ্টি কৰি আহিছে ৷ প্ৰথমতে গোৱালপাৰা জিলাতে ডাইনী হত্যাৰ বিৰুদ্ধে জনসচেতনতা আনিবলৈ চেষ্টা কৰি প্ৰায় দুটা দশক ধৰি তেওঁ এই অন্ধবিশ্বাস আঁতৰ কৰিবলৈ সংগ্ৰাম কৰি আহিছিল ৷ গাঁৱে-ভূঞে গৈ অন্ধবিশ্বাসৰ বিৰুদ্ধে মানুহক সজাগ কৰাৰ চেষ্টা চলাইছিল। ২০২১ চনত তেওঁক দেশৰ চতুৰ্থ অসামৰিক সন্মান, পদ্মশ্ৰী বঁটাৰে সন্মানিত কৰা হৈছিল ৷
ডাইনী সন্দেহত হত্যাৰ বিপক্ষে জনজাগৰণৰ এক নাম- বিৰুবালা ৰাভা। কায়িকভাৱে বিৰুবালা ৰাভা আমাৰ মাজত আৰু নাই, কিন্তু সমাজৰ হকে আগবঢ়োৱা নিস্বার্থ আৰু নিৰন্তৰ যাত্ৰাৰ বাবে তেওঁ আমাৰ মাজত সদায় জীয়াই থাকিব। কাৰণ বিৰুবালা ৰাভা এগৰাকী মাথোঁ তেজ- মঙহৰ মানুহ নহয়, কৰ্মৰে জীৱন মহান কৰিবলৈ সক্ষম হোৱা তেওঁ এক চিৰজ্যোতিষ্মান সূর্য।
