ভাৰতৰ প্ৰাচীন পৰম্পৰাৰ এক অন্যতম মূল্যবান উপহাৰ হৈছে যোগ । যোগাসন বা যোগাভ্যাস হৈছে এবিধ দৈহিক, মানসিক আৰু আধ্যাত্মিক দিশক সাঙুৰি লোৱা ভাৰতীয় পৰম্পৰাগত মূলৰ ৰীতি ।
প্ৰতিগৰাকী ব্যক্তিয়ে নিজকে সু-স্বাস্থ্যৱান আৰু ধুনীয়া কৰি ৰাখিব বিচাৰে৷ আৰু এই ক্ষেত্ৰত যোগ অভ্যাসে তাহানিৰে পৰা এক গুৰুত্বপূৰ্ণ ভূমিকা গ্ৰহন কৰি আহিছে৷ যোগ অভ্যাসে মানুহৰ দেহ মন সুস্থ সবল কৰি তুলাত এক অন্যতম অৰিহণা আগবঢ়াই আহিছে৷ লগতে নিয়মীয়াকৈ যোগ অভ্যাসে মানুহক দীৰ্ঘায়ু কৰি ৰাখে৷
বৰ্তমান মানুহৰ মাজত মেদবহুলতা এটা ডাঙৰ সমস্যা হৈ পৰিছে৷
প্ৰতিগৰাকী নাৰীয়ে নিজকে ধুনীয়াকৈ ৰাখিব বিচাৰে। শৰীৰৰ চৰ্বি বা মেদবহুলতা দূৰ কৰিবলৈ বহুতে ভিন্ন ধৰণে শৰীৰচৰ্চা কৰাও পৰিলক্ষিত হয় । বিশেষজ্ঞৰ মতে যোগে শৰীৰৰ চৰ্বি কিছু পৰিমাণে হ্ৰাস কৰাত সহায় কৰে৷
লগতে যোগে আমাৰ শৰীৰ, মন আৰু আত্মাক সংযোগ কৰি আমাৰ ভিতৰৰ সুপ্ত শক্তিসমূহ জাগ্ৰত কৰে ৷ নিয়মীয়া যোগ অভ্যাসে স্বাস্থ্যৰ প্ৰতি ভাবুকিৰ সৃষ্টিকাৰী ৰোগসমূহৰ হাৰ হ্ৰাস কৰাত সহায় কৰে ।
বৰ্তমানৰ ব্যস্ততাপূৰ্ণ জীৱনত স্বাস্থ্য ৰক্ষাৰ অৰ্থে আমি প্ৰতিজনেই এটা দিন ধাৰ্য কৰি যোগ অনুশীলনৰ যোগেদি শাৰীৰিক আৰু মানসিক ৰোগৰ পৰা পৰিত্ৰাণ পাব পাৰো৷
যোগ দিৱসৰ আজিৰ এই দিনটোত ভাৰতৰ এই চহকী যোগ সংস্কৃতিয়ে সকলোৰে দৈহিক, মানসিক, আত্মিক আৰু বৌদ্ধিক উত্তৰণ ঘটাই বিশ্ব শান্তি প্ৰতিষ্ঠা কৰক সেয়াই সকলোৰে কাম্য ।
