এইবাৰ ২২ জুনৰ পৰা ২৬ জুনলৈ কামাখ্যা ধামত মহা অম্বুবাচী মেলাৰ আয়োজন কৰা হৈছে। এইবাৰ ২২ জুনৰ দুপৰীয়া ২.৫৬ মিনিটত অম্বুবাচীৰ প্ৰবৃত্তি। আনহাতে ২৬ জুনৰ পুৱতি নিশা ৩ বজাত অম্বুবাচীৰ নিবৃত্তি। ইতিমধ্যে অম্বুবাচী মেলাৰ পূৰ্বে আগমন ঘটিছে বহু সাধু-সন্যাসীৰ।
কামাখ্যা দেৱী মন্দিৰ দেৱী সতীৰ ৫১ টা শক্তি পীঠৰ ভিতৰত অন্যতম।এই মন্দিৰত প্ৰতি বছৰে চাৰিদিনীয়া মেলাৰ আয়োজন কৰা হয়, য’ত দেশৰ বিভিন্ন প্ৰান্তৰ ভক্তসকলে অংশগ্ৰহণ কৰে। অসমৰ গুৱাহাটীৰ ব্ৰহ্মপুত্ৰ নদীৰ পাৰৰ নীলাচল পাহৰত অৱস্থিত বিখ্যাত কামাখ্যা মন্দিৰত অনুষ্ঠিত হয় এই বিশাল মেলা। য’ত সমাগম হয় অগণন ভক্তৰ। কামাখ্যা দেৱীক লৈ বহুতো বিশ্বাস আছে। এই ঠাইতে মাতৃ সতীৰ যোনিৰ এটা অংশ পৰিছিল বুলি বিশ্বাস কৰা হয়। কামাখ্যা মন্দিৰত সতী দেৱীক যোনি ৰূপত পূজা কৰা হয়।
অম্বুবাচী সমগ্ৰ উত্তৰ-পূব ভাৰততে পালন কৰা হয়৷ অম্বুবাচীৰ সময়ছোৱাত হাল বোৱা, কোনো ধৰণৰ মাংগলিক কাৰ্য সম্পন্ন কৰা নহয়৷ এই সময়ছোৱাত মঠ-মন্দিৰৰ দুৱাৰসমূহ বন্ধ থাকে৷ ঘৰুৱা নীতি নিয়মৰ ক্ষেত্ৰত, মাটিত কোনোধৰণৰ আচাৰ বা টেঙাজাতীয় সামগ্ৰী, লগতে লোহাৰ সামগ্ৰী ৰখা নহয়। লগতে, বিধৱা, ব্ৰহ্মচাৰী আৰু ব্ৰাহ্মিণ সকলেও ৰন্ধা-বঢ়া বন্ধ ৰাখে।অম্বুবাচীৰ প্ৰবৃত্তিৰ লগে লগে কামাখ্যা ধামৰ দুৱাৰ বন্ধ ৰখা হয়। সেইকেইদিন দেৱী দৰ্শন নিষিদ্ধ কৰি ৰখা হয়।
এইদৰেই অম্বুবাচীৰ এক স্বকীয়তা আছে, কৃষি-সমাজ আৰু ধৰ্মীয় আদৰ্শৰ গঠনমূলক প্ৰভাৱে এই পৰিঘটনা বাস্তৱ হোৱাৰ ক্ষেত্ৰত অৰিহনা যোগাইছে। এইদৰে ধৰ্মীয় পন্থীয়ে সহাঁৰি জনোৱা এই এক প্ৰতিকী স্বৰূপতান্ত্ৰীক সাধনাৰ ক্ষেত্ৰত কামাখ্যা এক অপ্ৰতিদণ্ডি কেন্দ্ৰ স্বৰূপো। ইয়াত এক তান্ত্ৰীক সমাজো আছে যি তেওঁলোকৰ গুৰুত্বপূৰ্ণ ৰাজেশ্বৰী পূজাও উদযাপন কৰে। তেওঁলোকৰ সকলো কাৰ্য্য গোপনীয় ভাৱে কৰা হয় কেৱল ইয়াৰ আৰম্ভণিৰ বাহিৰে। এই প্ৰথাৰ কোনো বাহ্যিক প্ৰদৰ্শন কৰা নহয়।
এই মেলাৰ সময়তে দেশৰ ওপৰি বিশ্বৰ ভিন্ন প্ৰান্তৰ পৰা সাধু-সন্ন্যাসীসকলে হৈ পৰে আকৰ্ষণৰ মূল কেন্দ্ৰবিন্দূ কামাখ্যা মন্দিৰত উপস্থিত হয় আৰু ভক্তসকলে বিৰল তান্ত্ৰিক অনুষ্ঠানৰ সাক্ষী হয়।
