২৫ নৱেম্বৰ, ২০২৫ঃ এগৰাকী অৰুণাচলী মহিলাৰ বাবে পুনৰ সীমাক লৈ বিবাদ আৰম্ভ হোৱাৰ দিশে ভাৰত-চীনৰ মাজত। পুনৰ অৰুণাচল প্ৰদেশ সম্পূৰ্ণ চীনৰ এলেকা বুলি দাবী উত্থাপন কৰিলে চীনৰ বৈদেশিক মন্ত্ৰালয়ে। তেওঁলোকৰ দাবী যে জাংনান (অৰুণাচল প্ৰদেশ) চীনৰ ভূ-খণ্ড। । ভাৰতে “অৰুণাচল প্ৰদেশ”ক নিজৰ বুলি কৰা দাবীক কেতিয়াও চানে স্বীকৃতি দিয়া নাই। এই মন্তব্যৰ পিছতেই কঠিন হৈ পৰিছে ভাৰত-চীনৰ মাজৰ সম্পৰ্ক। দীৰ্ঘদিন ধৰি অৰুণাচল প্ৰদেশক চীনে দক্ষিণ তীব্বত বুলি দাবী কৰি আহিছে।
দৰাচলতে, চীন ভ্ৰমণলৈ যোৱা অৰুণাচল প্ৰদেশৰ এগৰাকী ভাৰতীয় মহিলাই ভাৰতীয় পাছপ’ৰ্ট বাবে গৈছিল চাংহাইত ইমিগ্ৰেচন বিভাগলৈ। পাছপৰ্টৰ বাবে যোৱা মহিলাগৰাকীৰ অনুৰোধ অস্বীকাৰ কৰি প্ৰায় ১৮ ঘণ্টা ধৰি চাংহাই পুডং বিমানবন্দৰত আটক কৰি ৰাখিছিল মহিলাগৰাকীক। ভাৰতীয় নাগৰিক পেমা ৱাংজম থংডকে ২১ নৱেম্বৰত লণ্ডনৰ পৰা জাপানলৈ গৈ থকা অৱস্থাত চাংহাইত তিনি ঘণ্টাৰ বাবে অপেক্ষা কৰিবলগীয়া হৈছিল। বিমান বন্দৰত থকা বিষয়াসকলে মহিলাগৰাকীক নথি পত্ৰ পৰীক্ষা কৰি অৱশেষত ভাৰতীয় পাছপৰ্ট অবৈধ বুলি কৰিছিল ঘোষণা। কাৰণ অৰুণাচল প্ৰদেশক ভাৰতৰ ভু-খণ্ড বুলি স্বীকৃতি নিদিয়া চীনে মহিলাগৰাকী লগত থকা ভাৰতীয় পাছপৰ্টখন জব্দ কৰি ৰাখে।
এই ঘটনাৰ প্ৰতিক্ৰিয়া প্ৰকাশ কৰি চীনৰ বৈদেশিক মন্ত্ৰালয়ৰ মুখপাত্ৰ মাও নিঙে চীনে জাংনান বা দক্ষিণ তিব্বত বুলি উল্লেখ কৰা অৰুণাচল প্ৰদেশৰ ক্ষেত্ৰত বেইজিঙৰ দীৰ্ঘদিনীয়া স্থিতি পুনৰবাৰ উল্লেখ কৰে।
“জাংনান চীনৰ ভূখণ্ড। ভাৰতে অবৈধভাৱে স্থাপন কৰা তথাকথিত “অৰুণাচল প্ৰদেশ”ক চীনা পক্ষই কেতিয়াও স্বীকৃতি দিয়া নাই,”
ছ’চিয়েল মিডিয়াত ধাৰাবাহিকভাৱে পোষ্ট কৰাৰ জৰিয়তে অৰুণাচলী মহিলাগৰাকীয়ে তেওঁৰ দুৰ্দশাৰ সবিশেষ শ্বেয়াৰ কৰি কয় যে তেওঁক সোধা-পোছা কৰা হৈছিল আৰু প্ৰায় ১৮ ঘণ্টা সময়। তেওঁৰ অৰুণাচল প্ৰদেশৰ হোৱাৰ বাবে বিমানবন্দৰৰ বিষয়াসকলে বাৰে বাৰে তেওঁৰ পাছপ’ৰ্টক স্বীকৃতি দিবলৈ অস্বীকাৰ কৰিছিল।
নিজাববীয়াকৈ পৰিস্থিতি সমাধান কৰিব নোৱাৰি তাই ব্ৰিটেইনত থকা বন্ধু এজনৰ সহায় বিচৰাৰ ওপৰিও ভাৰতীয় কনছুলেটৰ সৈতে যোগাযোগ কৰে। কনছুলাৰৰ হস্তক্ষেপৰ ফলত অৱশেষত তাইক চাংহাই এৰি যাত্ৰা আৰম্ভ কৰিবলৈ অনুমতি দিয়া হয়।
এই ঘটনাই পুনৰবাৰ অৰুণাচল প্ৰদেশ সমস্যাক লৈ থকা সংবেদনশীলতাক পুনৰ সন্মুখলৈ আনিছে, ভাৰত-চীনৰ সম্পৰ্কত বিবাদৰ জুই উমি উমি জ্বলিছে। এই সন্দৰ্ভত নতুন দিল্লীতো তীব্ৰ প্ৰতিক্ৰিয়া। ভাৰত চৰকাৰে পুনৰ কয় যে এনে কাৰ্য গ্ৰহণযোগ্য নহয় আৰু ই ভ্ৰমণ আৰু অসামৰিক বিমান পৰিবহণ নিয়ন্ত্ৰণ কৰা প্ৰতিষ্ঠিত আন্তঃৰাষ্ট্ৰীয় নীতি-নিয়ম উলংঘা কৰে। এই খণ্ডটোক ভাৰতৰ সাৰ্বভৌমত্ব আৰু ভাৰতীয় পাছপ’ৰ্টধাৰীৰ অধিকাৰক সন্মান জনোৱাৰ বাবে চীনক আহ্বান জনোৱা পৰিলক্ষিত হৈছে।
